a cura di Gianfranco Ellero

Venerdì 19 dicembre 2025 ore 20,30 Centro della Comunità Franco Sgarban Via San Bartolomeo, 24 – Ara di Tricesimo

La lingua: Dialet lenga e stil

Di sigùr, paisàns, i no veis mai pensat ai repuars c’a passin fra
li ideis di «dialet», «lenga» e «stil». Quant ch’ i parlais, i ciacarais,
i sigais tra di vualtris, i doprais chel dialet ch’ i veis imparat
da vustra mari, da vustri pari e dai vustris vecius. E a son
sècui che i frus di chisçus loucs a sucin dal sen di so mari chel
dialet, e co a doventin òmis, a ghi lu insegnin encia lour ai soi
􀃞olùs. E par imparalu, a no coventin silabarios, libris, gramatichis;
a si lu parla cusì, coma c’ a si mangia o e’ a si respira. Nisun
di vualtris al savarès scrivilu, chistu dialet, e, squasi squasi,
nencia lèsilu. Ma intant lui al è vif, e se vif!, ta li vustris bocis,
tai lavris da li zovinutis, tai stomis dai fantas, e al suna alegramentri
di bràida in bràida, di ciamp in ciamp.
Cusì il dialet al è la pi ùmila e comun maniera di esprimisi al é
doma che parlat, nisun al si impensa mai di scrivilu.
Ma se a qualchidun a ghi vegnès che idea? I vuej disi l’idea di
doprà il dialèt par esprimi i so sintimins, li so pasions? No, tegnèivi
ben a mins, no par scrivi do tre stupidadis da fa ridi, o
par contà do tre storiutis vecis dal so pais (parsè che alora il
dialet al resta dialet, e basta li), ma cun l’ambisiòn di disi robis
pi elevadis, di􀃞silis, magari; se qualchidun, insoma, al crodès di
esprimisi miej cu ‘1 dialet da la so ciera, pi nouf, pi fresc, pi
fuart si no la lenga nasional imparada tai libris? Se a qualchidun
a ghi ven che idea, e al é bon di realisala, e altris c’ a
parlin chel stes dialet, a lu sèguitin e a lu imitin, e cussì, un puc
a la volta, a si ingruma na buna quantitat di material scrit, alora
chel dialet al doventa «lenga». La lenga a sarès cussì un dialet
seni e doprat par esprimi i sintimins pi als e segres dal cour.
Cussì, i veis di savè – par esempi – che il Talian na volta, tanciu
sècui fa al era encia lui doma che un dialet, fevelat da la puora
zent, dai contadins, dai famejs, dai sotans, mentri che i siors e
i studias a parlavin e a scrivevin in latin.