a cura di Gianfranco Ellero

Venerdì 20 febbrario 2026 ore 20.30 – Centro della Comunità Franco Sgarban – via San Bartolomeo, 24 Ara di Tricesimo

La storia: I Turcs tal Friùl

PREJERA “Crist,  pietàt dal nustri paìs. No par fani pì siors di chel ch’i sin. No par dani ploja. No par dani soreli.  Patì cialt e frèit e dutis li tempiestis dal sèil, al è il nustri distìn. Lu savìn. Quantis mai voltis ta chista nustra Glisiuta di Santa Cròus i vin ciantàt li litanis, parsè che Tu ti vedis pietàt da la nustra ciera! Vuèi  i si ‘necuarzìn di vèj preàt par nuja:  vuèi i si ‘necuarzìn che Tu ti sos massa pì in alt da la nustra ploja e dal nustri soreli e dai nustris afàns. Vuèi a è la muart ch’a ni speta cà intor. Cà intor, Crist, dulà ch’i sin stas tant vifs da crodi di stà vifs in eterno e che in eterno tu ti ves di dàighi ploja ai nustris ciamps, e salùt ai nustris puòrs cuarps. Ma di-n-dulà vènia che muart? Cui àia clamàt che zent di un altri mont a puartani la fin da la nustra puora vita, sensa pretesis, sensa idèai, sensa ‘na gota di ambiziòn? Ucà, a si stava, Crist, cu ‘l nustri ciar, cu la nustra sapa, cu ‘l nustri colt, cu la nustra Glisiuta … Èsia pussibul che dut chistu al vedi di finì? Se miracul èisa, chistu, Signòur, che tu ti vedis di vivi enciamò, quant che dut cà intor che adès al è vif, coma che s’al ves di stà vif par sempri, al sarà distrùt, sparìt, dismintiàt? E tu Verzin Beada? Sint se bon odòur ch’al sofla dal nustri paìs … Odòur di fen e di èrbis bagnadis, odòur di fogolàrs, odòur ch’i sintivi di fantassìn tornant dal ciamp. Ti, almancul Tu, ch’i ti vedis pietàt di nu, ch’i ti fermis il Turc.”